跳至正文

尼基迪亚踢阿仙奴之前 边位英超领队睇漏眼?

18岁嘅尼基迪亚礼拜二晚因为喺英格兰联赛杯梅开二度,帮阿仙奴反胜诺域治而一夜成名。不过,呢位英格兰小将并唔系一开始就踢阿仙奴 ,佢曾经踢过另一支伦敦球队车路士七年,不过之后畀人踢走,先转去兵工厂。

尼基迪亚喺2015年效力紧车路士U14嘅时候俾人踢走,阿仙奴之后邀请尼基迪亚试脚,唔使一个礼拜就已经用奖学金嘅形式将佢收归旗下。尼基迪亚加盟阿仙奴之后,同时间喺U18同埋U23上阵,2016/17球季帮兵工厂U18上阵16场入15球,喺U23踢咗26场就入咗12球,喺英国球坛叫做有少少名气。今年暑假阿仙奴出访澳洲同中国,尼基迪亚都有份,上个月欧霸杯作客4:2赢巴迪场波,尼基迪亚都有喺88分钟后备上阵。

睇返尼基迪亚离开车仔嘅时间,当时揸弗嘅好可能仲系摩连奴,因为佢系果年12月17日先俾人踢走,之前两年都系佢领军。英国传媒只系线年离开车路士,不过唔能够肯定嘅系,U14呢啲相对芝麻绿豆嘅事,摩佬有无花过时间去处理,如果真系佢自己睇漏眼走宝,唔知摩佬会唔会觉得可惜呢?

心水清嘅球迷应该会谂到一样嘢,就系云格开始教阿仙奴果阵,尼基迪亚到底喺边呢?

事实尼基迪亚的确系成为咗阿仙奴第一位喺云爷爷开始领军果阵仲未出世,又帮兵工厂入波嘅球员。讲到呢个统计,就连68岁嘅云格都忍唔住笑:「好唔好彩真系发生咗件咁嘅事,谂到我嚟阿仙奴教波果阵佢都仲未受精呢一点,我都觉得好犀利。不过呢件都系好事嚟,生命对年轻人嚟讲就系一个机会。希望尼基迪亚会喺阿仙奴踢得耐啲喇,我哋好锺意畀机会后生仔,呢个系我哋嘅DNA,以后我哋都会咁样做。」

标签:

发表回复

您的电子邮箱地址不会被公开。 必填项已用 * 标注